प्रधानमन्त्री अनुपस्थित भएपछि संसद्मा विपक्षीको विरोध, राजीनामाको माग

काठमाडौं आकृति सुनार —

आगामी आर्थिक वर्षको नीति तथा कार्यक्रममाथि संघीय संसद्मा भइरहेको छलफलका क्रममा प्रधानमन्त्री बालेन्द्र शाह उपस्थित नभएपछि विपक्षी दलहरूले चर्को विरोध जनाउँदै राजीनामासमेत माग गरेका छन्।
सरकारको महत्त्वपूर्ण नीति दस्तावेजमाथि छलफल भइरहेका बेला सरकार प्रमुख नै सदनमा अनुपस्थित हुनु संसद्को गरिमा र लोकतान्त्रिक अभ्यासमाथिको अपमान भएको विपक्षी सांसदहरूको आरोप छ।
बैठक सुरु हुनासाथ विपक्षी सांसदहरू उभिएर विरोधमा उत्रिएका थिए। उनीहरूले प्रधानमन्त्रीले संसद्लाई बेवास्ता गरेको तथा जनप्रतिनिधिहरूले उठाएका प्रश्नहरूको सामना गर्न नचाहेको बताएका छन्।
विपक्षी दलका सांसदहरूले नीति तथा कार्यक्रममाथि उठेका जिज्ञासाहरूको जवाफ प्रधानमन्त्री स्वयंले दिनुपर्ने संवैधानिक तथा नैतिक दायित्व रहेको उल्लेख गर्दै प्रधानमन्त्रीको अनुपस्थितिले सरकार संसद्प्रति अनुत्तरदायी रहेको स्पष्ट भएको दाबी गरेका छन्।
उनीहरूले “संसद्लाई छल्ने प्रधानमन्त्री पदमा बसिरहने नैतिक आधार गुमाइसकेको” भन्दै तत्काल राजीनामा दिन माग गरेका छन्। प्रधानमन्त्री अनुपस्थित भएपछि केही समय संसद्मा होहल्ला र अवरोधको अवस्था समेत सिर्जना भएको थियो।
विपक्षीको अवरोधबीच सभामुखले सदनको मर्यादा कायम राख्न आग्रह गर्दै प्रधानमन्त्रीको उपस्थितिका लागि सरकारको ध्यानाकर्षण गराएका छन्।