काठमाडौं – उमा आले
गृहमन्त्री सुधन गुरुङमाथि लागिरहेका आरोप र विवादका बीच उनको पछिल्लो स्पष्टीकरणले विवाद साम्य पार्नुको साटो थप चर्किएको छ। ‘मिडिया ट्रायल’को आरोप लगाउँदै उनले आफ्नो बचाउ गरे पनि राजनीतिक र सार्वजनिक वृत्तमा उनीमाथिको दबाब अझ बढेको देखिएको छ।
विवादास्पद व्यवसायीसँगको सम्बन्ध र सम्पत्ति विवरणमा लगानी लुकाएको आरोप सार्वजनिक भएपछि गुरुङ पहिलोपटक खुलेर बोलेका थिए। उनले आफूले गरेको सम्पूर्ण लगानी वैध भएको दाबी गर्दै बैंकिङ प्रणालीमार्फत भएको कारोबारलाई अपारदर्शी भन्न नमिल्ने बताएका छन्।
तर, उनको यो दाबीप्रति विभिन्न तहबाट प्रश्न उठिरहेका छन्। सामाजिक सञ्जालदेखि राजनीतिक दलभित्रसम्म उनको भूमिकामाथि छानबिन हुनुपर्ने माग तीव्र बन्दै गएको छ। विशेषगरी आफ्नै दलभित्रबाट समेत अनुसन्धानको आवाज उठ्नुले गुरुङ थप दबाबमा परेका छन्।
‘जेनजी’ आन्दोलनबाट उदाएका नेताका रूपमा चिनिएका गुरुङमाथि सोही आन्दोलनको मूल्य र एजेन्डाविपरीत काम गरेको आरोप समेत लागिरहेको छ। यसले उनको राजनीतिक छवि र विश्वसनीयतामाथि असर पार्ने विश्लेषण भइरहेको छ।
यता, राजीनामाको माग बढिरहेका बेला गुरुङले भने कुनै पनि अवस्थामा आफ्नो कार्यकालमा सुरु गरिएका कारबाही र सुधारका कामहरू नरोक्ने अडान दोहोर्याएका छन्। उनले आफूमाथि लगाइएका आरोपहरू तथ्यहीन भएको जिकिर गर्दै प्रमाणका आधारमा मात्र आलोचना गर्न चुनौती दिएका छन्।
यसबीच, सरकार र पार्टी नेतृत्वले यो विषयलाई कसरी सम्बोधन गर्छ भन्ने कुराले आगामी राजनीतिक समीकरणमा समेत प्रभाव पार्ने देखिन्छ। गुरुङमाथिको विवाद अब व्यक्तिगत स्पष्टीकरणभन्दा माथि उठेर राजनीतिक परीक्षणको विषय बन्न थालेको विश्लेषण गरिएको छ।
प्रतिक्रिया दिनुहोस्