काठमाण्डौं – काशी राम सुनार
मानवता नै सबैभन्दा ठूलो धर्म हो भन्ने उदाहरण प्रस्तुत गर्दै गैरआवासीय नेपाली संघ (NRNA) यूएईले पुनः एक उल्लेखनीय सामाजिक कार्य सम्पन्न गरेको छ।
पछिल्लो १४ दिनदेखि यूएईस्थित Mediclinic Hospital मा पक्षाघात (Paralysis) भई उपचाररत कमल लामिछानेको उपचारका क्रममा करिब ६०,००० दिराम (नेपाली रु. २४ लाख) बराबरको खर्च लागेको थियो। तर, सम्बन्धित अस्पतालले सम्पूर्ण उपचार खर्च पूर्ण रूपमा मिनाहा गरिदिएको छ, जुन एक अत्यन्तै सराहनीय मानवीय कदम हो।
अस्पतालको सहयोग र समन्वयपछि बिरामी लामिछानेलाई हिजो राति नेपाल एयरलाइन्समार्फत सुरक्षित रूपमा नेपाल पठाइएको छ। उहाँको सहज यात्राका लागि धर्मपत्नीलाई समेत साथमा पठाउने व्यवस्था मिलाइएको थियो।
यस कार्यमा गैरआवासीय नेपाली संघ अन्तर्राष्ट्रिय समन्वय परिषद् (ICC) मध्यपूर्व संयोजक रमेश श्रेष्ठ, उपाध्यक्ष मनोज कुमार श्रेष्ठ, सचिव भुवानी प्रसाद तिमिल्सिना, एनआरएनए एनसीसी यूएईका अध्यक्ष भीम मल्ल ठकुरी लगायतको सक्रिय भूमिका रहेको थियो। त्यस्तै नेपाली जनसम्पर्क समिति यूएईका महामन्त्रीद्वय तुलसीराम भुसाल र प्रताप सिंह तामाङ तथा केन्द्रीय सदस्य विजय श्रेष्ठको योगदान पनि महत्वपूर्ण रहेको बताइएको छ।
बिरामीसँग सम्पर्क स्थापना गर्ने, उपचार प्रक्रिया अघि बढाउने तथा अस्पतालबाट खर्च मिनाहा गराउने कार्यमा मनोज कुमार श्रेष्ठ, भुवानी प्रसाद तिमिल्सिना, रमेश श्रेष्ठ, भीम मल्ल ठकुरी र रमा शर्माको विशेष पहल रहेको थियो।
यस अभियानमा Embassy of Nepal, Abu Dhabi, Consulate General of Nepal, Dubai तथा कन्सुलेट जनरल हरि ओडारीको महत्वपूर्ण सहयोग पनि रहेको उल्लेख गरिएको छ।
एनआरएनए यूएईको बढ्दो सामाजिक प्रभाव
यूएईमा रहेका नेपालीहरूका समस्याहरू—विशेषगरी श्रम शोषण, दलालद्वारा ठगी, कम्पनीबाट अन्याय तथा आकस्मिक स्वास्थ्य समस्या—दिनप्रतिदिन बढिरहेका छन्। यस्ता अवस्थामा नेपाली दूतावासहरूमा ठूलो मात्रामा गुनासो आउने गरे पनि सीमित स्रोत र जनशक्तिका कारण सबै केसमा तत्काल हस्तक्षेप गर्न चुनौती हुने गरेको देखिन्छ।
यही खाली ठाउँलाई पूर्ति गर्दै गैरआवासीय नेपाली संघ (NRNA) यूएईले विगत केही वर्षदेखि सक्रिय रूपमा उद्धार, उपचार सहयोग, कानुनी समन्वय तथा स्वदेश फिर्ता व्यवस्थापन जस्ता कार्य गर्दै आएको छ।
एनआरएनए यूएईका अध्यक्ष भीम मल्ल ठकुरीका अनुसार, “दलालबाट ठगीमा परेका, कम्पनीबाट अन्याय भोगिरहेका तथा गम्भीर बिरामी भएका नेपालीहरूको उद्धार हाम्रो प्राथमिकता हो।”
- एनआरएनए यूएईले गरेका यस्ता थुप्रै सामाजिक कार्यहरू यसको आधिकारिक फेसबुक पेज र वेबसाइटमार्फत सार्वजनिक गर्दै आएको छ, जसले संगठनप्रति विश्वास र विश्वसनीयता थप मजबुत बनाएको छ।
कमल लामिछानेको उपचार खर्च मिनाहा गरी सुरक्षित स्वदेश फिर्ता गराउनु मात्र होइन, यो कार्यले यूएईमा रहेका नेपाली समुदायबीच एकताको सन्देश पनि दिएको छ।
सरकारी संयन्त्रसँग सहकार्य गर्दै सामाजिक संस्थाहरूले निभाएको भूमिका उल्लेखनीय छ, र आगामी दिनहरूमा यस्ता मानवीय कार्यहरू अझ प्रभावकारी हुने अपेक्षा गरिएको छ।
प्रतिक्रिया दिनुहोस्